Mərkəz haqqında məlumat
Azərbaycan xalqı xoşbəxtdir ki, ona Heydər Əliyev kimi müdrik siyasi xadim rəhbərlik edib. Bu sözlər dünyanın bir sıra dövlət başçılarının dilindən dəfələrlə səslənib. Bu, bir həqiqətdir. Məhz bu dahi insanın səyi nəticəsində Azərbaycan dönməz müstəqilliyə, inkişafa, tərəqqiyə qədəm qoydu. O, bütün həyatını doğma xalqına sərf edən, milli dövlətçiliyin əsasını qoyan dahi lider idi. Böyük Azərbaycansevər, xalqımızın ümummilli lideri Heydər Əlirza oğlu Əliyevin həyat və fəaliyyətinin, Azərbaycan tarixindəki misilsiz xidmətlərinin, Azərbaycanın hər bir bölgəsini özünə əziz tutan müdrik rəhbərimizin, eləcə də doğma Siyəzənimizə diqqət və qayğısının təbliği və tədqiqi məqsədilə rayonumuzda 2009-cu ildən Heydər Əliyev Mərkəzi fəaliyyətə başlamışdır. Siyəzən rayon Heydər Əliyev Mərkəzinin yeni inzibati binası müasir orijinal layihə əsasında inşasına 2013-cü ilin yanvar ayında başlanmış və iyul ayının 18–də başa çatdırılmışdır. Bina 3 mərtəbə və 14 otaqdan ibarətdir. Siyəzən rayon Heydər Əliyev Mərkəzinin açılışı 18 iyul 2013-cü ildə Azərbaycan Respublikasının Prezidenti cənab İlham Əliyevin Siyəzən rayonuna tarixi səfəri günündə olmuşdur. Ümumi sahəsi 1200 kv.metrdir. Heydər Əliyev Mərkəzinin foyesində ulu öndərin büst kompleksi qoyulmuşdur. Ulu öndər Heydər Əliyevin xatirəsinin əbədiləşdirilməsi baxımından böyük əhəmiyyəti olan Mərkəzin birinci mərtəbəsində, ekspozisiya zalında ümummilli liderin həyatının və çoxşaxəli dövlətçilik fəaliyyətinin müxtəlif dövrlərini əks etdirən 3 sərlövhə mövcuddur. Ekspozisiya zalında Heydər Əliyevin həyat və fəaliyyətini daha dərindən təbliğ etmək məqsədilə ümummilli liderin titanik ictimai-siyasi fəaliyyətinin müxtəlif dövürlərinə aid materiallar, fotoşəkillər, tarixi sənədlər nümayiş olunur.
Siyəzən rayon Heydər Əliyev Mərkəzində ümumilikdə 472 eksponat vardır. Bunlar Heydər Əliyevin müxtəlif dövrlərdə çəkdirdiyi 71 ədəd foto, 76 ədəd sənəd, 34 ədəd yağlı boya ilə cəkilmiş rəsm əsərləri, 1 büst və 290 ədəd kitabdan ibarətdir. Fotolarda Ulu Öndərin uşaqlıq, yeniyetməlik, tələbəlik illəri, Dövlət Təhlükəsizlik Komitəsində işlədiyi, Azərbaycan Kommunist Partiyasının birinci katibi olduğu dövrlərdə Siyəzən rayonuna səfərləri əks olunmuşdur. Buradakı eksponatlar və fotolardan aydın görünür ki, müasir Azərbaycan tarixinin çox mühüm və taleyüklü səhifəsi məhz Ümummilli Lider Heydər Əliyevin adı ilə bağlıdır.
Mərkəzin ikinci mərtəbəsində isə konfrans zalı, dizayn və nigah otağı, sərgi salonu vardır. Rəssamlıq dərnəyində məşğul olan şagirdlərin tez-tez rəsm sərgiləri təşkil olunur. Konfrans zalında müxtəlif tədbirlərin keçirilməsi üçün hər cür şərait təşkil edilib.
Mərkəzin III mərtəbəsində müasir internet klub, kitabxana və xarici dil öyrədən kurslar yaradılmışdır. Kompüter dərnəyində ümumtəhsil məktəblərinin şagirdləri və rayonumuzun gəncləri kompüter biliklərinə və kompüterlə işləmək bacarığına yiyələnmək imkanı əldə edir. Xarici dil kurslarına cəlb olunanlara müxtəlif xarici dillərdə (ingilis, rus, alman) biliklərini zənginləşdirərək həmin dildə sərbəst danışmaq qabiliyyətlərini artırmaqları üçün hər cür köməklik göstərilir.
Ümummilli Lider Heydər Əliyevin həyat və fəaliyyətini daha dolğun təbliğ etmək məqsədilə Mərkəzdə yaradılmış “Tədris otağında” Ulu Öndərlə bağlı filmlər nümayiş olunur, dərslər keçirilir. Ümumilikdə Mərkəzdə Ulu Öndərin irsini, həyat və fəaliyyətini özündə əks etdirən 52 disk vardır. Mərkəzdə eyni zamanda Azərbaycançılıq məfkurəsinin və Azərbaycanşunaslığın təşkili geniş şəkildə təbliğ olunur.Vaxtaşırı tariximizi və digər xalqların tarixini təbliğ etmək məqsədilə sərgilər təşkil olunur. Mərkəz müasir texnologiyalarla təchiz olunmuşdur və hamısı işlək qaydadadır.
Heydər Əliyev Mərkəzi fəaliyyətə başladığı gündən mütəmadi olaraq rayon və kənd məktəblərinin, idarə, müəssisə və təşkilatların, məktəbəqədər müəsissələrin mərkəzə ekskursiyaları, rayon sakinlərinin və rayona gələn qonaqların Mərkəzlə tanışlığı işi təskil olunmuşdur. Mərkəzin 70 nəfərlik böyük iclas zalında rayonun ən mötəbər tədbirləri, elmi konfransları, təhsil müəssisələrinn hazırladıqları tədbirlər də keçirilir.Ümumilikdə Siyəzən Rayon Heydər Əliyev Mərkəzində 70 tədbir keçirilmişdir. Mərkəzində il ərzində müxtəlif mövzularda, ən əsası Heydər Əliyevin yaradıcılığına həsr edilmiş ümumilikdə 30 sənədli film nümayiş etdirilmişdir.
Siyəzən rayon Heydər Əliyev Mərkəzi Regional İdarə tərəfindən təsdiq olunmuş illik iş planına uyğun keçirdiyi tədbirlər keçirir. Siyəzən Heydər Əliyev Mərkəzin keçirilən tədbirlər haqqında məlumat mütəmadi olaraq kütləvi informasiya vasitələrində Mərkəzin Facebook: Siyezen Heyder Eliyev Merkezi və Xaçmaz Regional Mədəniyyət idarəsinin facebook səhifəsində öz əksini tapmışdır. Həmçinin rayonun yerli mətbuat orqanı olan “Çıraq” qəzetində, Şimal arb TV-də işıqlandırılır. Bundan sonrakı fəaliyyətində Heydər Əliyev Mərkəzi Ulu öndərin zəngin irsinin tədqiqi və təbliği istiqamətində daha mühüm addımlar ataraq geniş tədbirlər həyata keçirməyi planlaşdırır.
