Yaxın mədəniyyət müəssisələri

Şəmkir Gənclər Mərkəzi

Şəmkir Gənclər Mərkəzi 11 sentyabr 2013-cü il tarixindən fəaliyyət göstərir. Ümumi sahəsi 9 h olan müəssisə 2 mərtəbədən ibarətdir. Şəmkir Gənclər Mərkəzi gənclərin inkişaf və yaradıcılığına töhfə verən bir sıra mühüm fəaliyyətlər həyata keçirir. Mərkəzdə gənclərin asudə vaxtlarının səmərəli təşkili məqsədilə dil kursları, intellektual oyunlar, yarışlar, əlamətdar günlərin keçirilməsi, bir sıra maarifləndirici sosial layihələr təşkil olunur.

Şəmkir Gənclər Mərkəzində aparılan işlərin istiqamətləri:

- Vətənpərvərlik tərbiyəsi;
- Sağlam həyat tərzinin təbliği;
- İctimai həyatda iştirak;
- Məşğulluq;
- Asudə vaxt;
- Yaradıcılıq;
- Digər: həmçinin təhsil və media

Şəmkir rayon Tarix-Diyarşünaslıq muzeyi

Şəmkir rayon Tarix-Diyarşünaslıq muzeyi 1971-ci ildə fəaliyyət göstərir.

Hazırda muzeydə həm ölkəmizin, həm də Şəmkirin tarixini əks etdirən eksponatlar var. Bu eksponatlar turistlər üçün böyük maraq doğuracaq, onlara ölkəmizin tarixi ilə daha yaxından tanış olmaq imkanı yaradacaq. Həmçinin muzey bu bölgənin tarixinin müxtəlif dövrlərini araşdırmaq üçün mühüm əhəmiyyətə malikdir.

Tarix-Diyarşünaslıq Muzeyində əsaslı yenidənqurma və təmir işlərinə 2015-ci ilin aprelində başlanılıb. Bu işlər ötən ilin noyabrında başa çatdırılıb. Muzeydə ulu öndər Heydər Əliyevin və Prezident İlham Əliyevin Şəmkirə səfərlərini əks etdirən fotolar, rayonun tanınmış ziyalıları, qəhrəmanları barədə məlumatlar var.

Muzeyin ümumi ərazisi 0,26 hektardır. İki mərtəbədən ibarət muzey binasının ümumi sahəsi isə 800 kvadratmetrdir. Muzeyin birinci mərtəbəsində iki bölmə yerləşir. Birinci bölmədə miniatür rəsm sərgisi və ekspozisiya zalı, ikinci bölmədə isə elektron informasiya lövhəsi və ekspozisiya zalı var. Muzeydə mövcud olan 6146 eksponatdan 350-si ekspozisiya zallarında sərgilənir. Bu eksponatlar əsasən qədim tunc dövrünə və XVIII-XIX əsrlərə aiddir. Qədim tarixi və geniş turizm potensialı olan Azərbaycanda belə muzeylərin yaradılması olduqca vacib məsələdir. Bu baxımdan Şəmkir Tarix-Diyarşünaslıq Muzeyinin də böyük əhəmiyyəti var.

Binanın həyətyanı sahəsində yaradılmış “Açıq muzey”də müxtəlif filmlərin personajlarının heykəlləri qoyulub. Həyətdə müasir işıqlandırma sistemi quraşdırılıb və yaşıllıq zolağı salınıb.

2017 -ci ilin avqustun 20-də Azərbaycan Respublikasının Prezidenti İlham Əliyev Şəmkirdə əsaslı şəkildə yenidən qurulan Tarix-Diyarşünaslıq Muzeyində yaradılan şəraitlə tanış olub.

Muzeydəki eksponatlar

İbtidai dövr – 9
Flora və fauna – 4
Arxeologiya – 521
Etnoqrafiya – 1457
Orta əsr qadın bəzək əşyaları – 39
Qədim döyüş silahları – 25
Numizmatika – 327
Yeni və müasir dövr – 4
İdeoloji şöbə - 2
Foto və tarixi sənədlər – 3758

Şəmkir Şahmat Məktəbi

Şəmkir şəhərində yeni Şahmat məktəbinin açılışı 01.05.2014-cü il tarixində baş tutub. Məktəbdə uşaqlara və yeniyetmələrə təcrübəli müəllimlər tərəfindən şahmat dərsləri keçirilir. Məktəbdə şahmatın sirlərinə yiyələnmək üçün hər cür şərait yaradılmışdır.

Şəmkir şəhər Parkı

Şəmkir Heydər Əliyev Mərkəzinin yaxınlığında böyük şəhər parkı salınıb. 2013-cü ildə açılan parkın ümumi sahəsi 22 hektardır. Onun ərazisində 7 müasir fəvvarə var, 800 metr uzunluğunda tunel tipli su kanalları çəkilib, kanalların üzərindən 10 körpü salınıb. Parkda həmçinin süni göl yaradılıb, təxminən 20 min bəzək ağacı və müxtəlif növ gül əkilib.

Şəmkir şəhər parkının özəl cəhəti isə böyük əyləncə mərkəzinin olmasıdır. Mərkəzdə çoxlu sayda açıq hava attraksionları və 150-dən çox oyun avtomatı olan örtülü pavilyon var. Açıq havada 12 növ başgicəlləndirici yelləncək və attraksion, o cümlədən bu gün Azərbaycanda yeganə olan “Amerikan təpəcikləri” quraşdırılıb.

Parkdakı orijinal “Şamburg” “fast-food” restoranında qəlyanaltı etmək və “ŞəmŞirin” qənnadı evində şirniyyatlar dadmaq mümkündür.